S kra yeddan
d imneggef
ass-mi
fellaγ tengedwa
ẓemken
ayen-din tagnitt
Nemyuzzam s tammiwin
Γunzan-aγ
imi nedda
negla-d s ufud
i tmaziγt
Snezγen yiffassen
imcumen
ayen akk nesεa d iseγ
nguggin igenwan
ahat fellaγ
ttnegnigen
ass-mi γ-wwin
s asekraf
d allen kan i yesmiglizen
s kra yellan
d imserref
ass-mi
yidneγ
tennuγna
wa yelha-d
d-useknef
deg weftis di tzegwa
abbuh
igenni yessef
Nekni
s tarwa
n uzayaḍ
i wiyaḍ
nga iswi
nura
nennuγ
nessuli
alarmi i-γ-terrez tayett
tban-ed tfawett
akin i tfidi
D imenfiyen
Nennejla
ur nukir
ur nenγa
nteddu
s tusmi.
ddan yidneγ
iγilifen
neteḍen
am tbarda am tlaba
D inekrafen
di tallit
deg wakud
am deg waluḍ
nsehbubuḍ
S kra yeḥlan
yelleḍ
s aseknaf
yecceḍ
D igejduren
d ihedman
atta-n tallit
a lxir inu
Yal yiwen
i yiman-is
neddukel
yiwet lhara
ur nettemyekcam.
D inekrafen
deg yizen
di tallitin
yettazalen
ger wussan
yenzan
yessneγ glan.
d inekrafen
i yizilan
d tirinin
d tadliwin
n yitijen
i-d nettagem.
d arrac
iteddun
d abrid
garawen
ay arrac
iwumi jelqen temẓi
d arrac
yettaklen akud
yidwen d abrid
ay arrac
yuker ufud.