Ula d nek ɣileɣ

Nniɣ-d ur d-nniɣ
igenni yexxerbubec
tiseɣlit teɣli
taḍsa qemmḍen-t
i warrac yettergigin
i ṣmadiḥ ddurin
itran nnejlan

Ula d nek ɣileɣ
Meqqer-it tmuɣliwin
Ziɣ ggugment deg ugani
Imi ikkersmumi
Berrant ur walant
Ayen ɣef nudant
D wiyaḍ i t-yufan

Ula d nek urgaɣ
I yi-ttwarregmen
Mliɣ I yi-qerḥen
I wi d iyi-kerhen
I wi d iyi-ḥemmlen
Ur nufi abrid
La jerrḍen d ajdiḍ

Mexluf BUƔAREB

Tid-nneɣ

S kra n wid iwumi neṭṭef afus
ffɣen-aɣ afus
nfan-aɣ-d seg yigrawen

Ama izad ama ixus
seččen-aɣ-t ɣas messus
nɣil-titen d atmaten

Mi neḍmaɛ ixelf-d umlus
ad neẓd abernus
rẓan-ɣ ifeggagen

azrar

Iɣaḍ-iyi uzrar sniɣ
Ziɣemma sniɣ-t d iwlessen
Ur umineɣ s wayen akk uriɣ
Yeqqel-iyi d 'imendeqqiren
tɣurr-iyi tɣirdemt ttiriɣ
la tesnernay deg yiɣilifen
ay at tmusni i ɣef tɛanniɣ
umran ad fell-aɣ fuken
attan tsusmi mi tt-rẓiɣ
ma sxesreɣ ad iyi-semmḥen

Tudert wezzilet

Tudert wezzilet
Tayri sellawet
Imɣan i melmi ?

Melmi ara ddun
Deg ijufar n warennger

Ger asurif
Ur k-id-ittarra wugur
Cali
Gar wannect-a n tayri

Ur as-qqar
Akmac deg wudmawen
Isawal i ucmumeḥ
Ddeqs i yedda
Deg yiɣezran
D umatu ula d netta
ɣer tlenni n tregwa
d abrid
s isekkuden

Tura
ddu d usefru
eḍfer iḍerfan
di ṭṭlam
nadi isurifen n wawal
akken ma llan
sukkes-iten-id si nnmara
ad qqlen d ilelliyen
ad neklu tadamcact
d tsusmi
i d-iččan imecciqen

ittmettat d turdas--S ɣur Pablo Neruda ( d tasuqqilt)

Ittmettat d turdas
win ur nettinig ara
win ur neqqar ara
win ur nsell i uzawan
win ur nessin ad d-yaf swallen-is

Ittmettat d turdas
win i tetten di nnif-is
win ur nettaǧǧa win ad yallen

Ittmettat d turdas
Win irran tannumi d azaglu
Win issnen kan yiwen ubrid
Win ur nettbeddil ara imensi
Win ur nettbeddil ara talaba ɣef yir-s
Win yettɣunzun ɣas ur k-issin

Ittmettat d turdas
Win yettagin ad iḥemmel
I ittagaen tilufa n tayri
Tiggad yessaɣayen ifettiwjen deg wallen
Am tafat yessejin ulawen ijerḥen

Itmettat d turdas
Win ur nettbeddil abrid
Mi ara yendef wul-is
Deg umahil neɣ mi ara ittiri
Win yettagaden tili-s
Win ur nessawaḍ ɣer tirga-s
Win ur nerwil di tudert-is
Ula d yiwen wass i yiwenniten n lɣir

Idir tura !
Erẓ asalu ass-a
Cemmer i yiɣallen tura
Ur ttmettat d turdas
Idir ayla-k n tumert


S ɣur Pablo Neruda ;
Irra-t-id ɣer teqbaylit Mexluf BUƔAREB

INIG

Ulamma inig
igguni
deg wannu
n tatut

Inagan
qqnen
d iɛassasen
ɣer timiṭ
n txeddit

Akken ibɣu iru
igenni
iru-ten-id d izfufen
ma ira

Aql-ay
yakan
nettani tafukt
ad d-tarew
nettat
tafat
i tefsut

Tudert-nneɣ

Tudert-nneγ
annect n yiγeẓran
annect n waḍu
mi ad ittuḍu
ger iγunam

tudert-nneγ
annect n tayri
kra yekka wass
ur tettnefḍas
ut tettmuγi

tudert-nneγ
annect n yimurar
annect n tafat
mi la d-tekkat
tiγezza idurar

tudert-nneγ
ur tfennu
ur tettfukku
annect n usaru
n tmacahutt

Tudert-nneγ
mači kan d inzan
tikli i yizilan
n yitbiren ungifen
i ileqqḍen iwzan

Tudert-nneγ
tugar aγilif
tugar iḥulfan
i aɣ-d-yennulfan
mi nezger asif

Tudert-nneɣ
D annect-a n tebɣest
D annect-a n usirem
I d-yemmaren
fell-aɣ d ihedman .

amsebrid

Iḍ yessegḍin tafrara

Iḍ yesseegḍin
Asrugmet
I d-isellen
I waḍu
Mi la yeqqar
Uhu
I nekni yesderdufen

Awi-d awi-d afus-im
Sendi-d uraw
Ad yagem
Iẓri yennudmen

Atan atan yewweḍ-ed
Ad yami tafat
Di tiffawt
I d-yuccagen
Si ger tafrara

Attan tili
D Tasusamt
Tessudem tillas
D tikli ad tessgem
Tala n wallen
Mi kem-twala

Iḍ d aceṭṭaḥ
Mi la yettnecraḥ
Wali-tt yefreḥ
Seg-s nettagem
I aɣ-yeswehmen

Iḍ yettirin
Tifendiwin
Zun d tiftilin

Mi d-teflali
Dɣa d tafrara
Ifuk wurar
Teḍsa tziri
Nejba s annar
Anda turar
Tayri d temẓi
War imurar

Eyya-d ad twaliḍ
Tura ma triḍ
Mi ad ittiri waddag
Di tniri
I yiman-is
ur ikukra
Ur yugad
Aɣurar
I d-yeskuducen

Tamacint n tudert / Tasuqqilt n usefru sɣur yiwen umeskar udrig

Tamacint n tudert


Ussan agi yezrin ɣriɣ yiwen udlis anda tudert tettak anza ɣer yinig di tmacint …

Acek-it !

-Tudert amzun d inig di tmacint !
Ad taliḍ, ad tadreḍ . Ttilint tlufa , tilin wuguren deg-s. Tikwal tettadded .
Mi ara yilin wuguren , gellun-d s teqṛeḥ akk d unezgum.

Mi ara d-nlal , mi ara nali ɣer tmacint, nettmagar-d imdanen; nettɣili ad qqimen yid-negh s kra ara yekk yinig : Widen d imawlan nneɣ .

Maca tidett qerriḥet . Nitni ad adren a ɣ-ǧǧen war tayri-nnsen , war leḥmala-nnsen, war tadukli-nnsen….

Ccwi llan wid nniḍen ara d-yalin ɣer tmacint. Ula d nitni ad sɛun azal d ameqqran
d atmaten, d tiyessetmatin-nneɣ ,d imeddukal akk d yal wid nnettḥemil ,wid nettiri.
Kra seg-sen ttɣilin inig d amerreḥ !

… Wiyaḍ ttmagaren-d umran , d unezgum.
Llan yimdanen nniḍen aten-an kan din i waken ad ilin ɣer yidis n wid ara yessutren afus n talelt .

Kra seg-sen ,mi ara d-adren si tmacint , ttaǧǧan-d leḥzen deg wul .
…wiyaḍ ttṣubbun-d imiren…, ur ten-rewwu ara ula s tmuɣli.

Nettwehhim mi ara nettwali wid nḥemmel qqimen deg tkeṛṛust nniḍen sdaxel n tmacint .Ttaǧǧan-ay i yiman nneɣ, nettinig ula d nekni weḥed-neɣ. Ulamma ulac win i ɣ-yugin ad nenadi fell-asen di tmacint .
Tikwal , ur nezmir ara ad neqqim ɣer tama-nnsen, acku amkan yufat-id lḥal yettwattef.
Ulac uɣilif ,akka ay d inig. Aṭas n tirga i nettaf deg yinig, illa daɣen usirem, usifed (adieu) amḥaref.( défis..)

Ad nɛaṛeḍ amek ara neddu akken yal yiwen degneɣ ad yaf iman-is.
- Yessekf ad nẓer d akken kra n yimeddukal n yinig zemren ad milen accemma akka, dɣa ad d-ssutren afus n talelt.
Nekni daɣen nezmer ad nmil. Maca yettili win ara ad ɣ-d-yefken tameẓẓuɣt , widak a ɣ-irefden ma neɣli..
Adrug ameqqran n yinig d akken ur yezmir yiwen ad iẓer melmi ara ad
d-yader si tmacint. Ur yeẓri melmi ara d-yader umeddakel-is ula d netta.
Ula d wid yettfaṛasen yidneɣ tagnitt, ur nezṛi melmi ara ad d-adren .



Ad iyi-ɣaḍ lḥal asmi ara ad d-adreɣ si tmacint Ula d nek, gziɣ acuɣer tura.
-Asmi ara ǧǧeɣ immeddukal, wid d-mmugreɣ di tmacint , iqriben, imawlan , i yiman-nnsen. Ass-nni zṛɣi-t d ass amcum.
Maca gziɣ ula d nekk, yiwen wass, ad awḍeɣ ɣer wanda ttrusun yimeddukal. Din ad ten-in afeɣ akkit. Ad n-awḍen yal yiwen s tyemmust-is, s waɛwin-is.
-Maca ad iyi-d-yaf lḥal ceṛḥeɣ imi lliɣ seg wid yettekkin di tyemmust nni i s-d-glan.

oOo
Nekni akkit ay imeddukal, ad d-nefk tazmert nneɣ akken ad yiẓid yinig alamma yewweḍ-d lawan n trusi si tmacint ….

Ad ssirmeɣ afud igerrezen I wid I d-iddan deg tmacint agi inu .

“Le train de la vie » – Rriɣ-tt-id ɣer teqbaylit deg waggur n tuber 2009